Ҷаласа оид ба таҳрири бобҳои аввали Барномаи миллии рушди Ҷумҳурии Тоҷикистон барои солҳои 2026–2030
7 сентябри соли 2025 дар Вазорати рушди иқтисод ва савдо ҷаласаи корӣ баргузор гардид, ки ба таҳрири ду боби аввали лоиҳаи Барномаи миллии рушди Ҷумҳурии Тоҷикистон барои солҳои 2026–2030 бахшида шуд.
Дар ҷаласа намояндагони департаментҳои дахлдори Вазорат, инчунин коршиносону мутахассисоне, ки дар таҳияи барнома саҳм мегузоранд, иштирок намуданд. Асосан ба такмили мазмуни ду боби аввали ҳуҷҷат, ки самтҳои стратегии асосӣ, чолишҳо ва афзалиятҳои рушди иҷтимоию иқтисодии кишварро дар давраи минбаъда муайян мекунанд, таваҷҷуҳ зоҳир гардид.
Дар ҷараёни муҳокима пешниҳодҳо вобаста ба тақвияти мантиқ ва пайдарҳамии матн, мушаххассозии ҳадафҳо ва вазифаҳо, инчунин мутобиқсозии барнома бо ҳуҷҷатҳои стратегии амалкунанда, аз ҷумла Стратегияи миллии рушд то соли 2030 ва ӯҳдадориҳои байналмилалии Тоҷикистон дар доираи Рӯзномаи рушди устувор баррасӣ шуданд.
Иштирокчиён зарурати ба назар гирифтани тамоюлҳои ҷаҳонию минтақавии кунунӣ, аз қабили тағйирот дар бозорҳои ҷаҳонӣ, чолишҳои вобаста ба тағйирёбии иқлим, равандҳои демографӣ ва рақамикунонии иқтисодро таъкид карданд. Ҳамзамон масъалаҳои баланд бардоштани рақобатпазирии кишвар, таъсиси ҷойҳои нави корӣ, тақвияти сармояи инсонӣ ва истифодаи устувори захираҳои табиӣ мавриди таваҷҷуҳи махсус қарор гирифтанд.
Дар анҷоми ҷаласа ҷонибҳо ба мувофиқа расиданд, ки таҳияи матни ҳуҷҷат бо дарназардошти пешниҳодҳо ва тавзеҳоти гирифташуда идома ёбад. Баррасии бобҳои минбаъдаи барнома дар ҷаласаҳои навбатии гурӯҳҳои корӣ ва Шӯрои таҳияи Барномаи миллии рушд сурат хоҳад гирифт.
