Вазорати рушди иқтисод ва савдо дар ҳамкорӣ бо Вазорати меҳнат муҳоҷират ва шуғли аҳолии Ҷумҳурии Тоҷикистон ва бо дастгирии Агентии ҳамкории техникӣ ва рушд (ACTED) дар доираи Гурӯҳи кории байниидоравӣ оид ба “Вусъатдиҳии шуғли пурмаҳсул”-и Шӯрои миллии рушди назди Президенти Ҷумҳурии Тоҷикистон дар мавзӯи “Шуғли пурмаҳсул ҳамчун ҳадафи стратегӣ дар доираи марҳилаи дуюми татбиқи Стратегияи миллии рушди Ҷумҳурии Тоҷикистон барои давраи то соли 2030, аз ҷумла Барномаи миёнамуҳлати рушди Ҷумҳурии Тоҷикистон барои солҳои 2021-2025” семенари омӯзишӣ баргузор намуд.
Дар ҷаласаи мазкур аъзои Гурӯҳи кории байниидоравӣ оид ба вусъатдиҳии шуғли пурмаҳсул, намояндагони мақомоти давлатӣ, шарикони рушд, бахши хусусӣ ва намояндагони ҷомеаи шаҳрвандӣ иштирок намуданд.
Ҷаласаро Мадҷон Мануҷеҳра Мирзоалӣ – ҳамоҳангсози котиботи Шӯрои миллии рушди назди Президенти Ҷумҳурии Тоҷикистон оғоз намуда барои ҳамкориҳои мутақобилан судманд дар самти тақвият бахшидани иқтидори зеҳнии кормандони мақомоти давлатӣ, шарикони рушд, бахши хусусӣ ва намояндагони ҷомеаи шаҳрвандӣ изҳори сипос баён намуд.
Қайд карда шуд, ки яке аз ҳадафҳои стратегие, ки дар Стратегияи миллии рушди Ҷумҳурии Тоҷикистон барои давраи то соли 2030 дарҷ гардидааст, ин таъмин ва тавсеаи шуғли пурмаҳсул дар кишвар бо афзоиши шуғли расмӣ ва маҳсулнокии меҳнат, сатҳи муносиби музди меҳнат, инчунин шароити бехатарии кор ба ҳисоб меравад.
Вобаста ба ин, доир ба омода намудани шарҳи фосилавии ҷараёни татбиқи “Барномаи миёнамуҳлати рушди Ҷумҳурии Тоҷикистон барои солҳои 2021-2025” ва гузоштани замина ба таҳияи лоиҳаи “Барномаи миёнамуҳлати рушди Ҷумҳурии Тоҷикистон барои солҳои 2026-2030” маълумот пешниҳод намуд.
Сипас Давлатзода Наим сардори Раёсати молия, таҳлил ва дурнамои Вазорати меҳнат муҳоҷират ва шуғли аҳолии Ҷумҳурии Тоҷикистон сухан намуда, қайд кард ки Вазорат дар татбиқи иҷрои 6 идикатори асосӣ ва 66 нақшаи чорабиниҳо (22 масъул, 44 ҳаммасъул) “Барномаи миёнамуҳлати рушди Ҷумҳурии Тоҷикистон барои солҳои 2021-2025” масъул мебошад. Инчунин, масъули иҷрои 8 ҳуҷҷати банақшагирии стратегӣ аз ҷумла 1 консепсия, 1 стратегия ва 6 барномаҳои соҳавиро корбарӣ мекунад, ки мақсади асосии ин ҳуҷҷатҳо барои ноил гардидан ба ҳадафи муайянгардидаи стратегии кишвар мебошад.
Дар рафти ҷаласа аз ҷониби Давлатзода Наим сардори Раёсати молия, таҳлил ва дурнамои Вазорати меҳнат муҳоҷират ва шуғли аҳолии Ҷумҳурии Тоҷикистон гӯзориш оид ба “Баррасии иҷрои индикаторҳои мақсадноки матритсаи нишондиҳандаҳои мониторинг ва арзёбии Барномаи миёнамуҳлати рушди Ҷумҳурии Тоҷикистон барои солҳои 2021-2025 ва нақшаи чорабиниҳои он барои солҳои 2021-2025”, Уктам Ҷумаев – коршиноси калони Агентии ҳамкории техникӣ ва рушд (ACTED) рӯнамо дар мавзӯи “Омӯзиши вазъи кунунии татбиқи сиёсати давлатӣ дар соҳаи мусоидат ба шуғли пурмаҳсули табақаҳои осебпазири аҳолӣ дар Ҷумҳурии Тоҷикистон”, Умед Муродзода муовини Директори Агентии меҳнат ва шуғли аҳолӣ гӯзориш дар мавзӯи “Тадбирҳои давлатӣ оид ба васеъ намудани шуғли маъюбон”, Саида Иноятова Лигаи занони маъюб директори Ташкилоти ҷамъиятии “Иштирок” ва Лола Насрединова директори Ташкилоти ҷомеъаи шаҳрвандии “Ирода” рӯнамо дар мавзӯи “Вазъи шуғли маъюбон ва монеаҳои асосии шуғл "Дохил кардани маъюбон ба бозори меҳнат: Мушкилот ва таҷрибаи Ташкилотҳои ҷомеъаи шаҳрвандӣ” ва аз ҷониби Санавбар Раупова Ташкилоти ҷамъиятии “Нерубахш” рӯнамо дар мавзӯи “Шахсони дорои маъюбият ва менеаҳои асосӣ дар самти бо кор таъмин шудани онҳо” мавриди баррасӣ қарор гирифт.
Дар анҷоми семинар аз ҷониби ҳамоҳангсози Шӯрои миллии рушди назди Президенти Ҷумҳурии Тоҷикистон қайд гардид, ки Вазорати меҳнат муҳоҷират ва шуғли аҳолии Ҷумҳурии Тоҷикистон дар иҷрои нақшаи чорабиниҳо ва индикаторҳои асосии мониторинг ва арзёбии Барномаи миёнамуҳлати рушди Ҷумҳурии Тоҷикистон барои солҳои 2021-2025 масъул буда, то давраи татбиқи пурраи барнома барои амалишавии он чораҳои зарурӣ андешада шавад. Ҳамзамон пешниҳодҳое, ки аз ҷониби баромадкунандагон ва иштирокчиён ирсол гардид дар таҳияи лоиҳаи Барномаи миёнамуҳлати рушди Ҷумҳурии Тоҷикистон барои солҳои 2026-2030 дар боби “Шуғли пурмаҳсул” ба инобат гирифта шаванд.
Лозим ба ёдоварист, ки дар доираи Шӯрои миллии рушди назди Президенти Ҷумҳурии Тоҷикистон бо мақсади такмили низоми мониторинг ва ҳисоботдиҳӣ оид ба татбиқи барномаҳои рушди миллӣ, соҳавӣ ва маҳаллӣ ва ҲРУ аз ҳисоби намояндагони вазорату идорахои соҳавӣ, ташкилоти ҷамъиятӣ, инчунин шарикони рушд 14 Гурӯҳи кории байниидоравӣ аз рӯи ҳадафҳои афзалиятноки Стратегияи миллии рушд барои давраи то соли 2030 ва Ҳадафҳои рушди устувор фаъолият менамояд.
Барои гирифтани маълумоти иловагӣ ба суроғаи зерин муроҷиат карда шавад:
Вазорати рушди имқтисод ва савдои Ҷумҳурии Тоҷикистон
Телефон: 2216408, www.developmentcouncil.tj
